Վաճառողի կանոններ

ԼԻՈՒԼԻ ՀԱՐԹԱԿԻ ՎԱՃԱՌՈՂՆԵՐԻ ՀԱՄԱՐ ՍԱՀՄԱՆՎԱԾ ԿԱՆՈՆՆԵՐ

Բարի գալուստ Ամերիաբանկ ՓԲԸ (այսուհետ` Բանկ) Լիուլի հարթակ (http://www.liooli.am/) (այսուհետ` Հարթակ): Հարթակում Դուք կարող եք ներկայացնել Ձեր ընկերության կողմից առաջարկվող տարբեր ապրանքներ` Հարթակի Օգտատերերին վաճառելու նպատակով: Հարթակն ապահովում է Ձեր ընկերության ապրանքների ներկայացման, գնանշման, որոնման, ընտրության, ինչպես նաև առցանց գնման համար անհրաժեշտ ծրագրային և տեխնիկական հնարավորությունները:

Օգտվելով Հարթակից` Դուք համաձայնում եք Հարթակի վաճառողների համար սահմանված կանոններին (այսուհետ` Կանոններ): Կանոնները տարածվում և գործում են, Կանոններով սահմանված իրավունքներն ու պարտականությունները համարվում են ծագած, իսկ համաձայնություններն ու թույլտվությունները` տրված այն վաճառողների համար, ովքեր գրանցվում են Հարթակում` ակցեպտավորելով Կանոնները: Ընդ որում, Կանոնները համարվում են ակցեպտավորված վաճառողների կողմից Հարթակում գրանցվելու պահից, որի համար պարտադիր պայման է նաև Կանոններին համաձայնելը` համապատասխան դաշտում նշում կատարելու միջոցով:

Կանոնները սահմանվում և կարող են միակողմանիորեն փոփոխվել Բանկի կողմից, հասանելի են Հարթակում: Կանոնների փոփոխությունների մասինՎաճառողները ծանուցվում են դրանց ուժի մեջ մտնելուց ոչ ուշ, քան 5 (հինգ) օր առաջ` Հարթակում  և Հարթակում գրանցված վաճառողների էլ. փոստի հասցեներին ծանուցում ուղարկելու միջոցով: Եթե մինչև փոփոխություններն ուժի մեջ մտնելու համար սահմանված ժամկետը Վաճառողը Հարթակի էլ. փոստի հասցեին գրավոր ծանուցում չի ներկայացնում Կանոնների ներքո Հարթակում Վաճառողի գործունեությունը դադարեցնելու իր ցանկության մասին, այդ փոփոխությունները համարվում են ընդունված (ակցեպտավորված) Վաճառողի կողմից:

Վաճառողի անհատական էջ

1. Կանոնների իմաստով Վաճառող հանդիսանում է այն իրավաբանական անձը կամ անհատ ձեռնարկատերը /այսուհետ` նշվածներից ցանկացածը առանձին, ինչպես նաև երկուսը միասին` Ընկերություն/, ով գրանցվում է Հարթակում Կանոններով սահմանված կարգով` իր կողմից վաճառվող ապրանքները Հարթակում ներկայացնելու և վաճառելու նպատակով:

2. Կանոնների իմաստով Օգտատերը հանդիսանում է այն ֆիզիկական անձը, ով գրանցվում է Հարթակում Կանոններով սահմանված կարգով` վերջինում ներկայացված և վաճառվող ապրանքների տեսականուն և գնման պայմաններին  ծանոթանալու և ցանկության դեպքում առկա ապրանքների տեսականուց գնումներ կատարելու նպատակով:

3. Հարթակում որպես Վաճառող գրացվելու համար Ձեզ անհրաժեշտ է Հարթակի միջոցով ներկայացնել հայտ Դառնալ գործընկեր էջում` լրացնելով անհրաժեշտ դաշտերը: Ձեր հայտը Հարթակի կողմից կդիտարկվի մինչև 3 /երեք/ աշխատանքային օրվա ընթացքում, որից հետո  Ձեր էլ. փոստին կուղարկվի հայտի հաստատման կամ մերժման մասին հաղորդագրություն: Ընդ որում, Ձեր կողմից հայտում լրացված էլ. փոստի հասցեն կհանդիսանա Ձեր անհատական էջի մուտքանունը: 

4. Հայտի հաստատման դեպքում Հարթակից ստացված հաղորդագրությունը կներառի Հարթակի` Ձեր անհատական էջ մուտք գործելու համար անհրաժեշտ հղումը և ժամանակավոր գաղտնաբառը: Նշված հղումով անցնելով` Դուք հնարավորություն կունենաք մուտք գործելու անհատական էջ և առաջին մուտքից հետո փոխել գաղտնաբառը: Մուտքանվան և Ձեր կողմից սահմանված գաղտնաբառի միջոցով Դուք հնարավորություն կունենաք մուտք գործելու անհատական էջ, ինչպես նաև վերահսկելու և կառավարելու Ձեր ապրանքատեսականին, պատվերները, վաճառքները, Օգտատերերի հաղորդագրությունները և այլն:

5. Հայտի հաստատման մասին հաղորդագրությունը ստանալուց հետո անհրաժեշտ է այցելել Բանկ և բացել Կանոնների 13 կետի համաձայն պահանջվող բանկային հաշիվ և ստորագրել անհրաժեշտ փաստաթղթերը, որի համար անհրաժեշտ կլինի Հարթակից ստացված հաղորդագրության մեջ նշված` Ձեր անհատական էջի մուտքանունը: Գործընթացը բարեհաջող ավարտելուց հետո Հարթակի կողմից Ձեր անհատական էջը կակտիվացվի, և այդ մասին Ձեր էլ.փոստին կուղարկվի հաղորդագրություն: Իսկ մինչ այդ Ձեր անհատական էջը տեսանելի չի լինի Հարթակի այցելուների և Օգտատերերի համար:

6. Ձեր հայտին ընթացք տալու համար լրացուցիչ ճշտումներ կատարելու և ցանկացած այլ տեսակի հաղորդակցման համար հիմք են ընդունվելու Ձեր կողմից հայտում նշված էլ. փոստի հասցեն և բջջային հեռախոսահամարը: Ընդ որում, նշված հաղորդակցման տվյալները հայտում սխալ մուտքագրելու, այլ անձին պատկանող հաղորդակցման տվյալներ մուտքագրելու և/կամ մուտքագրած հաղորդակցման տվյալները կամ դրանցից որևէ մեկը հիմք ընդունելու արդյունքում Հարթակից կամ Հարթակում գրանցված ցանկացած անձից Ձեր վերաբերյալ ցանկացած տեղեկատվություն այլոց հայտնի դառնալու համար Բանկը կամ Հարթակը որևէ պատասխանատվություն չեն կրում: 

7. Ձեր հայտին ընթացք տալու ընթացքում լրացուցիչ ճշտումների անհրաժեշտության դեպքում Հարթակի պատասխանատուները կարող են կապվել Ձեզ հետ հայտում նշված էլ. փոստի կամ բջջային հեռախոսահամարի միջոցով: Լրացուցիչ ճշտումների արդյունքում ստացված տեղեկատվությունը կուղարկվի Ձեր կողմից նշված էլ. փոստի հասցեին` ուղարկված տեղեկատվության վերաբերյալ Ձեր անվերապահ կամ, անհրաժեշտության դեպքում, որոշակի փոփոխություններով հաստատումը  պատասխան նամակով ստանալու համար: Ընդ որում, Ձեր կողմից տրամադրված հաղորդակցման վերոնշյալ միջոցներից ցանկացածով լրացուցիչ ճշտումներ կատարելու նպատակով Ձեզ հետ կապվելու դեպքում ստացված տեղեկատվությունը համարվում է Ձեր կողմից տրամադրված, որի արժանահավատության, ամբողջականության կամ օրինականության համար Բանկը կամ Հարթակը որևէ պատասխանատվություն չեն կրում:

8. Հիմք ընդունելով ինտերնետային տիրույթում իրականացվող գործարքների գծով զեղծարարությունների իրականացման հնարավորությունները, ինչպես նաև նպատակ հետապնդելով կանխարգելել նման զեղծարարություների իրականացումը` Վաճառողները պարտավորվում են գաղտնի պահել Հարթակ մուտք գործելու իրենց մուտքանունն ու գաղտնաբառը և որևէ դեպքում նշված տեղեկատվությունը չհայտնել որևէ երրորդ անձի, ինչպես նաև չպատասխանել որևէ եղանակով, այդ թվում նաև էլեկտրոնային եղանակով ստացված որևէ հարցման, որով պահանջվում է հայտնել սույն կետում նշված կամ այլ նշանակալի որևէ տեղեկատվություն: 

Անձնական տվյալների պաշտպանություն

9. Վաճառողը սույնով համաձայնում է, որպեսզի Հարթակը, անկախ իրականացման ձևից և եղանակից (այդ թվում՝ ավտոմատացված, տեխնիկական ցանկացած միջոցներ կիրառելով կամ առանց դրանց), «Անձնական տվյալների պաշտպանության մասին» ՀՀ օրենքով սահմանված կարգով և սահմաններում մշակի, օգտագործի Հարթակում գրանցվելու, ինչպես նաև Հարթակում ցանկացած գործունեություն իրականացնելու, գործարք կնքելու կամ այլնի կապակցությամբ Հարթակի միջոցով Վաճառողի հայտնած անձնական տվյալները, ինչպես նաև դրանք հայտնի կամ այլ կերպ հասանելի դարձնի Հարթակին հասանելիություն ունեցող ցանկացած այլ անձի, այդ թվում` նաև Հարթակի տեխնիկական սպասարկումն ապահովելու շրջանակներում Հարթակի հետ համագործակցող և վերջինիս գործընկեր հանդիսացող ընկերություններին: Սույն համաձայնությունը գործում է Վաճառողի և Հարթակի միջև հաստատված հարաբերությունների ողջ ժամկետի ընթացքում: Վաճառողը սույնով համաձայնում է նաև, որ Հարթակի միջոցով Վաճառողի հայտնած անձնական տվյալներն օգտագործվեն նաև Բանկի կողմից` Վաճառողի վարկավորման հնարավորությունները դիտարկելու և/կամ Վաճառողին տարաբնույթ բանկային ծառայություններից օգտվելու առաջարկներ ներկայացնելու նպատակով: Ընդ որում, Վաճառողի կողմից Հարթակին պահանջ ներկայացվելու դեպքում անձնական տվյալները կուղղվեն, կոչնչացվեն, տվյալների մշակումը կդադարեցվի կամ մշակման հետ կապված այլ պահանջվող գործողություն կկատարվի, եթե ՀՀ օրենսդրությամբ և/կամ Բանկի ներքին իրավական ակտերով այլ բան նախատեսված չէ:

Վճարման կարգը

10. Հարթակը հնարավորություն է տալիս Վաճառողներին Հարթակի միջոցով  վաճառելու Հարթակում ներկայացված ապրանքները Հարթակի Օգտատերերին:  

11. Հարթակի միջոցով վաճառված ապրանքի դիմաց Վաճառողին գումարի վճարումն իրականացվելու է Վաճառողի կողմից ապրանքն օգտատիրոջն առաքումից հետո` առաքման մասին Վաճառողի կողմից էլեկտրոնային հավաստումը Հարթակում գրանցվելուց կամ Հարթակին առաքման մասին հաստատումը էլ. փոստի միջոցով ուղարկվելուց հետո մինչև 5 /հինգ/ աշխատանքային օրվա ընթացքում:  

12. Հարթակի միջոցով վաճառված ապրանքների դիմաց Վաճառողին վճարումներն իրականացվում են Բանկի միջոցով` վերջինիս կողմից սահմանված պայմաններով, որի համար Վաճառողը Բանկին վճարում է Բանկի և Վաճառողի միջև համաձայնեցված միջնորդավճար: 

13. Վաճառողը պարտավորվում է Բանկում բացել  բանկային հաշիվ` Հարթակի միջոցով վաճառված ապրանքների գումարների ստացման նպատակով:

Առաքման, գնումների վերադարձի և գումարի փոխհատուցման կարգը

14. Պատվիրված ապրանքի առաքումն իրականացնում է Վաճառողը` ինքնուրույն կամ սեփական նախաձեռնությամբ առաքման ծառայության միջոցով:

15. Ընդ որում, Կանոններով Վաճառողը պարտավորվում է`

15.1 Երևան քաղաքում առաքումն իրականացնել մինչև 3 օրացուցային օրվա ընթացքում` անվճար, բացառությամբ այն դեպքերի, երբ Վաճառողի կողմից Երևան քաղաքում առաքման համար սահմանված է Հարթակի հետ համաձայնեցված այլ սակագին

15.2 ՀՀ մարզեր առաքումն իրականացնել մինչև 5 օրացուցային օրվա ընթացքում` անհրաժեշտության դեպքում կիրառելով առաքման համար լրացուցիչ միջնորդավճար, որը վճարվելու  է Հարթակի օգտատիրոջ կողմից ապրանքի գնման գործարքի ընթացքում` ավտոմատ ավելանալով ապրանքի արժեքին:

16. Հարթակի կողմից առաքման ծառայության կազմակերպման հնարավորության դեպքում Վաճառողը կարող է միանալ այդ ծառայությանը` կնքելով Հարթակի հետ առաքման կազմակերպման համար անհրաժեշտ փաստաթղթերը:

17. Սպառողների իրավունքների պաշտպանության մասին ՀՀ օրենքի համաձայն Հարթակի Օգտատերերն իրավունք ունեն գնված ապրանքն իրենց հանձնվելու օրվանից 14 օրվա ընթացքում վերադարձնելու կամ փոխարինելու գնված ապրանքը: Նման մտադրության մասին նրանք կարող են անմիջապես կամ Հարթակի միջոցով տեղեկացնել Վաճառողին: Ապրանքի վերադարձի կամ փոխարինման պահանջը ստանալու օրվանից 1 /մեկ/ աշխատանքային օրվա ընթացքում Վաճառողը պարտավորվում է կապ հաստատել Օգտատիրոջ հետ` ներկայացնելով ապրանքի վերադարձի և/կամ փոխարինման մանրամասները: Վաճառողը պարտավորվում է Օգտատիրոջ կողմից նման պահանջի ներկայացման պահից մինչև 3 /երեք/ օրացույցային օրվա ընթացքում` Երևան քաղաքի դեպքում, և մինչև 5 /հինգ/ օրացույցային օրվա ընթացքում` ՀՀ մարզերի դեպքում, կամ Վաճառողի և Օգտատիրոջ միջև համաձայնեցված ժամկետում ապահովել ապրանքի համապատասխանաբար` փոխարինումը կամ վերադարձը` սեփական միջոցների հաշվին, եթե տվյալ ապրանքի փոխարինման կամ վերադարձի պատճառը ապրանքի վնասված, թերի լինելն է, կամ Հարթակում զետեղված նկարին և ապրանքի նկարագրությանը չհամապատասխանելն է: Նշվածներից տարբերվող պատճառներով փոխարինման կամ վերադարձի դեպքում Վաճառողը կարող է գանձել Հարթակի Առաքման մասին բաժնում սահմանված առաքման միջնորդավճարը: Ապրանքի վերադարձի կամ փոխարինման գործընթացի ավարտին Վաճառողը Հարթակին գրավոր տեղեկացնում է այդ մասին` նշելով Օգտատիրոջը վերադարձի ենթակա գումարի չափը և/կամ գանձման ենթակա գումարի չափը:

18. Ապրանքի վերադարձի դեպքում այն հետ ընդունելուց հետո Վաճառողը ինքնուրույն Հարթակում կատարում է պատվերի կարգավիճակի փոփոխություն Կանոնների  25.3 կետի համաձայն կամ Վաճառողի տեղեկացմամբ կարգավիճակը փոխվում է Հարթակի կողմից: Պատվերի կարգավիճակի փոփոխության, ինչպես նաև Կանոնների 17 կետում նշված` Վաճառողի կողմից Հարթակին գրավոր տեղեկացման հիման վրա Բանկը Վաճառողի կողմից Կանոնների 19 կետի համաձայն  Բանկում բացված իր բանկային հաշվին Օգտատիրոջը վերադարձման ենթակա գումարին կամ Բանկի կողմից հաստատված պահանջում նշված գումարին համարժեք մնացորդ ապահովելուց հետո 3 /երեք/ բանկային օրվա ընթացքում ապահովում է Օգտատիրոջ քարտին գումարի վերադարձը` ամբողջ գումարի չափով կամ ամբողջ գումարի և առաքման միջնորդավճարի տարբերության չափով:  

19. Միաժամանակ Վաճառողը պարտավորվում է Կանոններով սահմանված կարգով ապրանքի վերադարձ տեղի ունենալու հիմքով Հարթակում պատվերի կարգավիճակի փոփոխությունից հետո մինչև 1 /մեկ/ աշխատանքային օրվա ընթացքում, իսկ Կանոնների և/կամ վճարումների կատարման համար Բանկի կողմից սահմանված կանոնների խախտումով կամ ապօրինաբար կատարված լինելու, ինչպես նաև երրորդ անձի կողմից Բանկին գումարի վերադարձման պահանջ ներկայացվելու և այդ պահանջը Բանկի կողմից հաստատվելու հիմքով այդ մասին Բանկի կողմից Վաճառողին գրավոր համապատասխան հիմնավորում ներկայացվելուց հետո 2 /երկու/ աշխատանքային օրվա ընթացքում Բանկում բացված իր բանկային հաշվին ապահովել համապատասխանաբար Օգտատիրոջը վերադարձման ենթակա  գումարին կամ Բանկի կողմից հաստատված պահանջում նշված գումարին համարժեք մնացորդ:  

20. Կանոններով սահմանված կարգով ապրանքի վերադարձ տեղի ունենալու դեպքում Օգտատիրոջը վերադարձման ենթակա գումարը Կանոններով սահմանված ժամկետում վերադարձնելու նպատակով Վաճառողը Կանոններն ակցեպտավորելու ուժով իրավունք է վերապահում Բանկին անակցեպտ կարգով միակողմանիորեն գանձել վերադարձման ենթակա  գումարը Վաճառողի` Բանկում գործող բանկային հաշվից:

21. Կանոններն ակցեպտավորելու ուժով Վաճառողն իրավունք է վերապահում Բանկին Վաճառողից (կամ նրա բանկային հաշիվներից) գանձել գործարքների գումարները` Կանոնների և/կամ վճարումների կատարման համար Բանկի կողմից սահմանված կանոնների խախտումով կամ ապօրինաբար կատարված լինելու, ինչպես նաև երրորդ անձի կողմից Բանկին գումարի վերադարձման պահանջ ներկայացվելու և այդ պահանջը Բանկի կողմից հաստատվելու դեպքերում` այդ մասին նախապես` 2 աշխատանքային օր առաջ, գրավոր համապատասխան հիմնավորումը ներկայացնելով Վաճառողին:

22. Խորհուրդ ենք տալիս առաքումից առաջ հնարավորինս համոզվել Հարթակի միջոցով վաճառված ապրանքի լիարժեքության, սարքինության և թերությունների բացակայության հարցում` խուսափելով հետագա վերադարձի հետ կապված գործընթացից: 

Պատվերների կառավարում

23. Հարթակի Օգտատիրոջ կողմից ապրանքի գնման/պատվերի մասին տեղեկատվությունը Վաճառողին հասանելի է Հարթակում` Վաճառողի անհատական էջում: Բացի այդ, գնման/պատվերի մասին տեղեկատվությունը, ապրանքի դիմաց գանձման հաստատումից անմիջապես հետո, ուղարկվում է նաև Վաճառողի` Հարթակում գրանցված էլ. փոստի հասցեին: 

24. Պատվերների կարգավիճակը թարմացվում է Վաճառողի կողմից իր անհատական էջում կամ տեխնիկական հնարավորության առկայության պարագայում Հարթակի կողմից Վաճառողից ստացված էլ. հաղորդագրության հիման վրա: 

25. Վաճառողը, կախված պատվերի բնույթից և մշակման ընթացքից` կիրառում է հետևյալ կարգավիճակները`

25.1 «Կատարված»` ապրանքն Օգտատիրոջն  առաքումից հետո

25.2 «Չեղարկված»` Հարթակի օգտատիրոջ կողմից` մինչև  Վաճառողի կողմից ապրանքի ուղարկումը  գործարքի չեղարկման դեպքում

25.3 «Վերադարձված»` Կանոնների և Սպառողների իրավունքների պաշտպանության մասին ՀՀ օրենքի համաձայն Օգտատիրոջ կողմից ապրանքի վերադարձի դեպքում: 

26. Ապրանքի փոխարինումը կատարվում է Կանոնների 17 կետի համաձայն: Ընդ որում, Օգտատիրոջն առաքված վնասված, թերի կամ Հարթակում զետեղված նկարին և ապրանքի նկարագրությանը  չհամապատասխանող  ապրանքը նույն տեսակի և նույն գնի  ապրանքով փոխարինման դեպքում, ինչպես նաև մնացած այն դեպքերում, երբ ապրանքի փոխարինման ընթացքում չի առաջանում  Օգտատիրոջից առաքման միջնորդավճարի գանձման հարց, Հարթակում Վաճառողը չի իրականացնում պատվերի կարգավիճակի փոփոխություն` թողնելով «Կատարված»: Իսկ նշվածներից տարբերվող պատճառներով` Օգտատիրոջ ցանկությամբ ապրանքի փոխարինման դեպքում, երբ առաջանում է վերջինից առաքման միջնորդավճարի գանձման հարց, Վաճառողը պատվերի կարգավիճակը դարձնում է «Վերադարձված» և նոր ապրանքի գնումն ու առաքումը կատարվում է` որպես նոր պատվեր:   

27. Այն դեպքում, եթե Օգտատիրոջն առաքված վնասված, թերի կամ Հարթակում զետեղված նկարին և ապրանքի նկարագրությանը չհամապատասխանող ապրանքի փոխարինումը Վաճառողի կողմից անհնար է, ապա Վաճառողը պարտավորվում է Կանոնների 17 կետի համաձայն ապահովել ապրանքի վերադարձը Օգտատիրոջից: 

Վաճառողի պատասխանատվությունը   

28. Հարթակում տեղադրված տեղեկատվությունը, այդ թվում` ապրանքներ վաճառողների, նրանց կողմից առաջարկվող ապրանքների, դրանց բնութագրերի, առանձնահատկությունների, գների, գնման հնարավորությունների և կարգի, ինչպես նաև Հարթակում տեղադրված ցանկացած այլ տվյալ ունի տեղեկատվական նշանակություն և չի հանդիսանում հրապարակային օֆերտա: Նշված տեղեկատվությունը հանդիսանում է օֆերտա անելու հրավեր: 

29. Հարթակի  միջոցով Հարթակի  մասնակիցների միջև նամակագրությունը չի կարող որակվել որպես օֆերտա, ակցեպտ, նրանց միջև պայմանագրի կնքման հաստատում կամ ապացույց: Վաճառողի և Օգտատիրոջ միջև պայմանագրային հարաբերությունը ծագում է Օգտատիրոջ կողմից Հարթակում պատվերի հաստատման և վճարման բարեհաջող կատարման պահին:  

30. Վաճառողները պատասխանատվություն են կրում Հարթակում իրենց, ինչպես նաև իրենց կողմից վաճառվող ապրանքների, դրանց հասանելիության և հասանելի քանակի, որակի, բնութագրերի, առանձնահատկությունների, գնի, գնման հնարավորությունների, առաքման, ինչպես նաև մնացյալ բոլոր պայմանների վերաբերյալ ամբողջական, թարմացված  և արժանահավատ տեղեկատվություն  զետեղելու համար: Նշված թարմացումը Վաճառողները կատարում են թարմացված տեղեկատվությունը Հարթակին անհապաղ ուղարկելու միջոցով, իսկ եթե առկա է տեխնիկական հնարավորություն, ապա այդ թարմացումը  կատարում են ինքնուրույն:

31. Վաճառողը պարտավորվում է Հարթակը զերծ պահել Հարթակում զետեղված տեղեկատվության հիման վրա կայացված որոշումների արդյունքում և/կամ գնման հնարավորությունները դիտարկելու պահի դրությամբ Հարթակում տեղադրված տեղեկատվության, այդ թվում` Վաճառողի, իր կողմից առաջարկվող ապրանքների, դրանց առկայության/հասանելիության, քանակի, բնութագրերի, առանձնահատկությունների, գների, գնման հնարավորությունների և կարգի, ինչպես նաև տեղադրված ցանկացած այլ տեղեկատվության կամ տեղեկատվության տարբերության/փոփոխության հետ կապված, ինչպես նաև գնման պահի դրությամբ որևէ ապրանքի որևէ հիմքով վաճառքի անհնարինության կամ որևէ այլ հիմքով Հարթակի որևէ մասնակցի կամ որևէ այլ երրորդ անձի կողմից ներկայացված ցանկացած, այդ թվում` նաև օրինական պահանջից, ներառյալ վնասի, այդ թվում` բաց թողնված օգուտի հատուցման պահանջից: Վերոնշյալ իրավիճակի պայմաններում սույնով Վաճառողը հրաժարվում է նաև վերոնշյալ հիմքերից որևէ մեկով, մի քանիսով կամ բոլորով Բանկին կամ Հարթակին որևէ պահանջ ներկայացնելուց` ստանձնելով իրավիճակից բխող, ինչպես նաև Հարթակի մասնակիցների կամ որևէ այլ երրորդ անձանց կողմից ներկայացվելիք հնարավոր պահանջի լուծման և բավարարման պատասխանատվությունը: Ընդ որում, սույն կետում նշված որևէ հիմքով Բանկի կամ Հարթակի կողմից պատասխանատվություն կրելու/պատասխանատվության ենթարկվելու դեպքում համապատասխանաբար Բանկը կամ Հարթակը ձեռք է բերում հետադարձ պահանջի իրավունք Վաճառողի նկատմամբ, իսկ վերջինս պարտավորվում է բավարարել այդ պահանջը:

32. Վաճառողները պարտավորվում են Հարթակին զերծ պահել Հարթակում տեղադրված և Հարթակի միջոցով վաճառվող ապրանքների որակի, առաքման, հայտնաբերված թերությունների կամ որևէ այլ հանգամանքով պայմանավորված պահանջից: Վաճառողները պատասխանատվություն են կրում Հարթակի միջոցով վաճառվող ապրանքների որակի, բոլոր տեսակի թերությունների, առաքման ժամկետների և ապրանքին և վերջինիս վաճառքին առնչվող բոլոր հնարավոր խնդիրների համար: Վերոնշյալ իրավիճակի պայմաններում սույնով Վաճառողները հրաժարվում են նաև վերոնշյալ հիմքերից որևէ մեկով, մի քանիսով կամ բոլորով Բանկին կամ Հարթակին որևէ պահանջ ներկայացնելուց` ստանձնելով իրավիճակից բխող, ինչպես նաև Հարթակի մասնակիցների կամ որևէ այլ երրորդ անձանց կողմից ներկայացվելիք հնարավոր պահանջի լուծման և բավարարման պատասխանատվությունը: Ընդ որում, սույն կետում նշված որևէ հիմքով Բանկի կամ Հարթակի կողմից պատասխանատվություն կրելու/պատասխանատվության ենթարկվելու դեպքում համապատասխանաբար Բանկը կամ Հարթակը ձեռք է բերում հետադարձ պահանջի իրավունք Վաճառողի նկատմամբ, իսկ վերջինս պարտավորվում է բավարարել այդ պահանջը:

33. Հարթակի միջոցով իրականացված որևէ գործարքի առնչությամբ իր իրավունքներն ու պարտականությունները պաշտպանելու նկատառումներից ելնելով` Բանկը և/կամ Հարթակն իրավասու են Վաճառողներից պահանջել ցանկացած, այդ թվում գործարքին առնչվող ցանկացած տեղեկատվություն, իսկ Վաճառողները պարտավոր են տրամադրել պահանջված տեղեկատվությունը, ինչպես նաև այլ կերպ աջակցել Հարթակի իրավունքների և օրինական շահերի պաշտպանությանը:

34. Վաճառողները սույնով համաձայնում են, որ Հարթակը Վաճառողների վերաբերյալ ցանկացած, այդ թվում նաև գաղտնիք կազմող տեղեկությունները տրամադրի ՀՀ օրենսդրությամբ սահմանված անձանց, դեպքերում և կարգով, ինչպես նաև

34.1 քրեական հետապնդում իրականացնող մարմիններին` զեղծարարության, խարդախության կամ հանցագործության կամ դրանց վերաբերյալ կասկածի կամ վտանգի առկայության դեպքերում,

34.2 ապահովագրական ընկերություններին, վերաապահովագրողներին, ապահովագրական հատուցումների տրամադրման գործընթացում փորձաքննություն իրականացնող մասնագիտական անձանց` Հարթակի իրավունքներն ու օրինական շահերը պաշտպանելու անհրաժեշտության դեպքերում և սահմաններում:

35. Վաճառողը պարտավորվում է բարեխղճորեն արձագանքել/պատասխանել Հարթակի միջոցով Օգտատերերի կողմից ապրանքի վերաբերյալ ուղարկված հարցերին, բողոքներին, ինչպես նաև առաջարկներին:

36. Հարթակի շրջանակում Վաճառողի ապրանքի վերաբերյալ Հարթակի Օգտատերերի կողմից կատարված մեկնաբանությունները և կարծիքները համարվում են Հարթակի սեփականությունը և չեն կարող օգտագործվել Վաճառողի կողմից այլ հարթակներում, կայքերում, սոց. ցանցերի էջերում և այլ տիրույթներում: 

37.  Վաճառողը պարտավորվում է Հարթակում ներկայացված ապրանքների գները սահմանել ոչ ավել քան դրանք ներկայացված են սեփական կամ այլ ֆիզիկական և/կամ առցանց խանութներում/հարթակներում: Զեղչերի կամ այլ արշավների դեպքում Հարթակում ներկայացված ապրանքների գները պետք է համապատասխանաբար թարմացվեն:    

38. Վաճառողը պարտավորվում է Հարթակին տրամադրել իր ապրանքանիշը Հարթակում ներկայացված Վաճառողի ապրանքների էջում, «Մեր գործընկերները» և «Մեր ապրանքանիշները» էջերում տեղադրելու համար: Բացի այդ, Վաճառողը տալիս է իր համաձայնությունը Բանկի և Հարթակի կողմից իր ապրանքանիշը սոց. ցանցերի էջերում և տարբեր գովազդային հարթակներում օգտագործելու համար: 

39. Հարթակում ներկայացված ապրանքների վերաբերյալ տեղեկատվության ճշգրտության, լիարժեքության, ինչպես նաև պոտենցիալ գնորդների տեսանկյունից հասկանալի ներկայացման նպատակով Հարթակը վերահսկում է Վաճառողի կողմից իրեն տրամադրված կամ Վաճառողի կողմից ինքնուրույն ներմուծված ապրանքների մասին տեղեկատվությունը` իրավունք ունենալով սեփական հայեցողությամբ կատարելու տեղեկատվության ներկայացման ձևի և բովանդակության փոփոխություն` միևնույն ժամանակ չխախտելով ապրանքի վերաբերյալ հիմնական բովանդակությունը: Հարթակի կողմից Վաճառողից ստացված տեղեկատվության կամ Վաճառողի կողմից Հարթակում ինքնուրույն ներմուծված ապրանքների մասին տեղեկատվության` Հարթակի կողմից  խմբագրման դեպքում ապրանքի վերաբերյալ Հարթակում ներկայացված բովանդակությունը հանդիսանում է Հարթակի սեփականությունը, և Վաճառողն իրավունք չունի Հարթակի կողմից խմբագրված տեղեկատվությունը նույնությամբ կիրառել այլ հարթակներում, կայքերում, սոց. ցանցերի էջերում և այլ տիրույթներում: 

40. Վաճառողը կարող է համագործակցել Հարթակի հետ իր ապրանքների վաճառքի խրախուսման նպատակով արշավների, զեղչերի և հատուկ առաջարկների շրջանակում` յուրաքանչյուր նման առաջարկ առանձին քննարկելով Հարթակի հետ: 

41. Վաճառողը պարտավորվում է չօգտագործել Հարթակի շրջանակներում Օգտատերերի վերաբերյալ իրեն հասանելի դարձած տեղեկատվությունը Օգտատերերին ապրանքների գնման նպատակով այլ հարթակ/կայք/սոց. ցանցի էջ ուղղորդման նպատակով: 

42. Հարթակի շրջանակներում վաճառվող ապրանքների որակի, առաքման ժամկետների կամ այլնի առնչությամբ Վաճառողի կողմից թույլ տրված խախտումների բացահայտման դեպքում Հարթակը Վաճառողին ուղարկում է գրավոր ծանուցում` նշելով խախտման դեպքերն ու պահանջելով դադարեցնել դրանք: Ընդ որում, Վաճառողի գործունեությունը Հարթակում կարող է ժամանակավորապես կասեցվել մինչև վերջինիս կողմից պարզաբանումների ներկայացումը: Գրավոր ծանուցումը ստանալուց հետո 15 /տասնհինգ/ օրացուցային օրվա ընթացքում նշված խախտումները չդադարեցնելու/չվերացնելու դեպքում և/կամ պարզաբանումներ չներկայացվելու դեպքում Վաճառողի գործունեությունը հարթակում կարող է դադարեցվել` անկախ Վաճառողի կամահայտությունից:

 Տեխնիկական սպասարկում

43. Հարթակը տրամադրում է Վաճառողին տեխնիկական աջակցություն Հարթակի շրջանակում ծագած յուրաքանչյուր խնդրի կամ Վաճառողի մոտ առկա հարցերի վերաբերյալ: 

44. Տեխնիկական խնդիրների կամ հարցերի դեպքում Վաճառողը դիմում է Հարթակին shop@liooli.am էլ. փոստին նամակ գրելու կամ 010 513130 հեռախոսահամարին զանգի միջոցով:

45. Հարթակն իրավունք ունի միակողմանիորեն իրականացնելու Հարթակի բարելավմանն ուղղված ֆունկցիոնալ փոփոխություններ, որոնց մասին համապատասխան ծանուցումը, ինչպես նաև անհրաժեշտության դեպքում Վաճառողների ուսուցանումն իրականացվում է Հարթակում Վաճառողի գրանցված էլ. փոստի հասցեի միջոցով: 

Համագործակցության դադարեցում

46. Վաճառողի կողմից Հարթակի հետ համագործակցության դադարեցման մտադրության դեպքում վերջինս գրավոր նամակ է ուղարկում` Հարթակում զետեղված էլ. փոստի հասցեին` նշելով համագործակցության դադարեցման պատճառն ու ցանկալի ամսաթիվը, որը չի կարող լինել ավելի վաղ, քան նամակն ուղարկելու օրվանից հետո 10 /տասը/ աշխատանքային օրը: 

47. Հարթակը Վաճառողի նամակի հիման վրա դադարեցնում է վերջինիս գործունեությունը Հարթակում: Ընդ որում, մինչև Վաճառողի գործունեության փաստացի դադարեցումը Հարթակում, Վաճառողն ամեն դեպքում իրավասու է Հարթակում զետեղված էլ. փոստի հասցեին գրավոր նամակ ուղարկելով, խնդրել գործունեությունը դադարեցնելու վերաբերյալ իր գրավոր նամակին ընթացք չտալ:

48. Հարթակում Վաճառողի գործունեությունը կարող է դադարեցվել նաև Կանոնների 43 կետով սահմանված կարգով: 

49. Համագործակցության դադարեցման դեպքում Վաճառողի ապրանքատեսականին այլևս Հարթակում տեսանելի և հասանելի չի լինում Օգտատերերին, բացի այդ նաև դադարեցվում է մուտքը Վաճառողի անհատական էջ: Ընդ որում, դադարեցման պահին Հարթակում գրանցված Վաճառողի էլ. փոստին ուղարկվում է  դադարեցման մասին ծանուցում: 

50. Նախքան համագործակցության դադարեցումը և դրանից բխող իրավական հետևանքների առաջացումը Վաճառողի կողմից Հարթակի միջոցով կնքված բոլոր գործարքների գծով Վաճառողը շարունակում է կրել բոլոր պարտականություններն ու պատասխանատվությունը` համաձայն Կանոնների: 

Վեճեր և վիճարկումներ

51. Հարթակի և Վաճառողների միջև Կանոններով ամրագրված ցանկացած կարգավորման առնչությամբ ծագած վեճերն ու տարաձայնությունները լուծվում են բանակցությունների միջոցով: Ընդ որում, 15 /տասնհինգ/ օրյա ժամկետում համաձայնության չգալու դեպքում ծագած վեճերն ու տարաձայնությունները լուծվում են ՀՀ օրենսդրությամբ սահմանված կարգով: 

 11RBD RL 72-45-01, Խմբ. 3, ուժի մեջ է` 05.05.2021թ.-ից