Կանոններ

ԼԻՈՒԼԻ ՀԱՐԹԱԿԻ ՕԳՏԱՏԵՐԵՐԻ ՀԱՄԱՐ ՍԱՀՄԱՆՎԱԾ ԿԱՆՈՆՆԵՐ

Բարի գալուստ Ամերիաբանկ ՓԲԸ (այսուհետ` Բանկ) Լիուլի հարթակ (http://www.liooli.am/) (այսուհետ` Հարթակ): Հարթակը նախատեսված է ֆիզիկական անձանց կողմից տարբեր ապրանքների առցանց գնման համար, որի շրջանակում Հարթակն ապահովում է այդ ապրանքների որոնման, ընտրության, ինչպես նաև առցանց գնման համար անհրաժեշտ ծրագրային և տեխնիկական հնարավորությունները:

Գրանցվելով  Հարթակում` Դուք համաձայնում եք Հարթակի Օգտատերերի համար սահմանված կանոնններին (այսուհետ` Կանոններ): Կանոնները տարածվում և գործում են, Կանոններով սահմանված իրավունքներն ու պարտականությունները համարվում են ծագած, իսկ համաձայնություններն ու թույլտվությունները` տրված Հարթակի այն Օգտատերերի համար, ովքեր գրանցվում են Հարթակում` ակցեպտավորելով Կանոնները: Ընդ որում, Կանոնները համարվում են ակցեպտավորված Օգտատիրոջ կողմից Հարթակում  գրանցվելու պահից, որի համար պարտադիր պայման է նաև Կանոններին համաձայնելը` համապատասխան դաշտում նշում կատարելու միջոցով:

Կանոնները սահմանվում և կարող են միակողմանիորեն փոփոխվել Բանկի կողմից, հասանելի են Հարթակում: Կանոնների փոփոխությունների մասին Օգտատերերը ծանուցվում են դրանց ուժի մեջ մտնելուց ոչ ուշ, քան 5 (հինգ) օր առաջ`  Հարթակում  դրանք հասանելի դարձնելու, նաև հրապարակելու միջոցով: Եթե մինչև փոփոխություններն ուժի մեջ մտնելու համար սահմանված ժամկետը Օգտատերը Հարթակի էլ. փոստի հասցեին գրավոր ծանուցում չի ներկայացնում Կանոնների ներքո Հարթակում Օգտատիրոջ գործունեությունը դադարեցնելու իր ցանկության մասին, այդ փոփոխությունները համարվում են ընդունված (ակցեպտավորված) Օգտատիրոջ կողմից:

Անձնական էջ

1. Կանոնների իմաստով Օգտատերը հանդիսանում է այն ֆիզիկական անձը, ով գրանցվում է Հարթակում Կանոններով սահմանված կարգով` վերջինում ներկայացված և վաճառվող ապրանքների տեսականուն և գնման պայմաններին ծանոթանալու և ցանկության դեպքում առկա ապրանքների տեսականուց գնումներ կատարելու նպատակով:

2. Հարթակում գրանցվելու համար անհրաժեշտ է ստեղծել Ձեր անձնական էջը և դառնալ Օգտատեր, որը պարտադիր պայման է Հարթակից գնումներ կատարելու համար:

3. Հարթակում անձնական էջ ստեղծելու համար պահանջվում է լրացնել գրանցման էջի համապատասխան դաշտերը, ինչպես նաև  սահմանել գաղտաբառ: Հարթակում կարող են գրանցվել 18 /տասնութ/ տարեկանը լրացած անձինք:

4. Հարթակում գրանցվելու նպատակով Ձեր կողմից տրամադրված տեղեկատվության արժանահավատության, ամբողջականության կամ օրինականության համար Բանկը կամ Հարթակը որևէ պատասխանատվություն չի կրում:

5. Հարթակում կատարված գործողությունների համար Ձեզ հետ հաղորդակցման համար հիմք են ընդունվելու Անձնական էջում Ձեր կողմից լրացված էլ. փոստի հասցեն և բջջային հեռախոսահամարը: Ընդ որում, Հարթակում գրանցվելիս նշված հաղորդակցման տվյալները սխալ մուտքագրելու, այլ անձին պատկանող հաղորդակցման տվյալներ մուտքագրելու և/կամ մուտքագրած հաղորդակցման տվյալները կամ դրանցից որևէ մեկը հիմք ընդունելու արդյունքում Հարթակից կամ Հարթակում գրանցված ցանկացած անձից Ձեր վերաբերյալ կամ Ձեզ ուղղված ցանկացած տեղեկատվություն այլոց հայտնի դառնալու համար Բանկը կամ Հարթակը որևէ պատասխանատվություն չեն կրում: 

6. Հարթակի միջոցով կատարված վճարային գործողությունների, քարտային գործարքների պարզաբանման հարցերով Օգտատերը պարտավոր է դիմել իրեն սպասարկող Բանկ, ընդ որում՝ այն դեպքերում, երբ Օգտատերը հանդիսանում է Ամերիաբանկի հաճախորդ, ապա վճարային և քարտային գործարքներին վերաբերող հարցերով Բանկն իրավասու է կիրառել Հաճախորդների հեռահար նույնականացման իր կանոնները, այլ ոչ թե Հարթակի Անձնական էջում նշված տվյալները։ 

7. Գրանցվելով Հարթակում` Օգտատերն ավտոմատ բաժանորդագրվում է Հարթակի կողմից նորությունների, առաջարկների, ինչպես նաև այլ տեղեկատվական բնույթի ծանուցումների ծառայությանը:

8. Հիմք ընդունելով ինտերնետային տիրույթում իրականացվող գործարքների գծով զեղծարարությունների իրականացման հնարավորությունները, ինչպես նաև նպատակ հետապնդելով կանխարգելել նման զեղծարարություների իրականացումը` Օգտատերերը պարտավորվում են գաղտնի պահել Հարթակ մուտք գործելու իրենց մուտքանունն ու գաղտնաբառը, առցանց վճարումներ կատարելու նպատակով օգտագործվող վճարային միջոցների/քարտերի տվյալները, որևէ դեպքում նշված տեղեկատվությունը չհայտնել որևէ երրորդ անձի, ինչպես նաև չպատասխանել որևէ եղանակով, այդ թվում նաև էլեկտրոնային եղանակով ստացված որևէ հարցման, որով պահանջվում է հայտնել սույն կետում նշված կամ այլ նշանակալի որևէ տեղեկատվություն: 

9. Հարթակի շրջանակներում Օգտատիրոջ կողմից Հարթակում գրանցվելու պայմանների, ինչպես նաև Կանոններով սահմանված դրույթների խախտումների բացահայտման դեպքում Հարթակն իրավասու է դադարեցնել Օգտատիրոջ գործունեությունը Հարթակում:  

Անձնական տվյալների պաշտպանություն

10. Օգտատերը սույնով համաձայնում է, որպեսզի Հարթակը, անկախ իրականացման ձևից և եղանակից (այդ թվում՝ ավտոմատացված, տեխնիկական ցանկացած միջոցներ կիրառելով կամ առանց դրանց), Անձնական տվյալների պաշտպանության մասին ՀՀ օրենքով սահմանված կարգով և սահմաններում մշակի, օգտագործի Հարթակում գրանցվելու, ինչպես նաև Հարթակում ցանկացած գործունեություն իրականացնելու, գործարք կնքելու կամ այլնի կապակցությամբ Հարթակի միջոցով Օգտատիրոջ հայտնած անձնական տվյալները, ինչպես նաև դրանք հայտնի կամ այլ կերպ հասանելի դարձնի Հարթակին հասանելիություն ունեցող ցանկացած այլ անձի, այդ թվում Հարթակի տեխնիկական սպասարկումն ապահովելու շրջանակում Հարթակի հետ համագործակցող և վերջինիս գործընկեր հանդիսացող ընկերություններին: Սույն համաձայնությունը գործում է Oգտատիրոջ և Հարթակի միջև հաստատված հարաբերությունների ողջ ժամկետի ընթացքում: Օգտատերը սույնով համաձայնում է նաև, որպեսզի Հարթակի միջոցով Օգտատիրոջ հայտնած անձնական տվյալներն օգտագործվեն նաև Բանկի կողմից` Օգտատիրոջ վարկավորման հնարավորությունները դիտարկելու և/կամ Օգտատիրոջը տարաբնույթ բանկային ծառայություններից օգտվելու առաջարկներ ներկայացնելու նպատակով:  Ընդ որում, Օգտատիրոջ կողմից Հարթակին պահանջ ներկայացնելու դեպքում անձնական տվյալները կուղղվեն, կոչնչացվեն, տվյալների մշակումը կդադարեցվի կամ մշակման հետ կապված այլ պահանջվող գործողություն կկատարվի, եթե ՀՀ օրենսդրությամբ և/կամ Բանկի ներքին իրավական ակտերով այլ բան նախատեսված չէ:

 Վճարման կարգը

11. Հարթակը հնարավորություն է տալիս Օգտատերերին ձեռք բերելու Հարթակում ներկայացված ապրանքները սեփական կամ փոխառու միջոցներով: Ընդ որում, Հարթակում ներկայացված ապրանքների դիմաց Հարթակի միջոցով սեփական միջոցների հաշվին վճարում կատարելու դեպքում Օգտատերը վճարումը կարող է իրականացնել իր ArCa/Visa/Mastercard վճարային քարտի միջոցով` թողարկված ՀՀ տեղական կամ միջազգային բանկերի կողմից: Քարտով առցանց վճարումն իրականացվում է  Բանկի միջոցով անվճար: Ապրանքների դիմաց փոխառու միջոցներով վճարելու ցանկության, նման ծառայության և տեխնիկական հնարավորության հասանելիության դեպքում Օգտատերը Հարթակում լրացնում է համապատասխան վարկավորման հայտը: Հայտի դիտարկումը և փոխառու միջոցների տրամադրումը կատարվում է  Բանկի կողմից` վերջինիս սահմանած կարգով և պայմաններով, որոնք ներկայացված են վարկավորման հայտի էջում:  Ընդ որում, Հարթակում տվյալ պահին առկա վճարման եղանակներին կարող եք ծանոթանալ Վճարումների մասին էջում: 

 Հարթակի պատասխանատվությունը

12. Հարթակում տեղադրված տեղեկատվությունը, այդ թվում` վաճառողների, նրանց կողմից առաջարկվող ապրանքների, դրանց բնութագրերի, առանձնահատկությունների, գների, գնման հնարավորությունների և կարգի, ինչպես նաև ցանկացած այլ տվյալ ունի տեղեկատվական նշանակություն և չի հանդիսանում հրապարակային օֆերտա: Նշված տեղեկատվությունը հանդիսանում է օֆերտա անելու հրավեր: Ընդ որում, Օգտատիրոջ  կողմից ընտրված ապրանքը Հարթակում իր զամբյուղում մուտքագրելու պարագայում տվյալ ապրանքը չի համարվում Օգտատիրոջ կողմից ամրագրված, քանի որ այլ Օգտատերերի կողմից դրանց փաստացի գնման պարագայում և լրացուցիչ քանակի բացակայության դեպքում այն կարող է հասանելի չլինել տվյալ Օգտատիրոջ համար, և վերջինս կստանա ավտոմատ հաղորդագրություն զամբյուղում առկա ապրանքի անհասանելիության վերաբերյալ:   

13. Հարթակի միջոցով Հարթակի որևէ մասնակիցների միջև նամակագրությունը չի կարող որակվել որպես օֆերտա, ակցեպտ կամ որևէ մասնակիցների միջև պայմանագրի կնքման հաստատում կամ ապացույց: Հարթակում ապրանք վաճառողի և Օգտատիրոջ միջև պայմանագրային հարաբերությունը ծագում է Օգտատիրոջ կողմից Հարթակում պատվերի հաստատման և վճարման բարեհաջող կատարման պահին: 

14. Հարթակը պատրաստակամ է իր հնարավորությունների սահմաններում գործադրելու առավելագույն  ջանք, որպեսզի Հարթակում զետեղված լինի թարմացված և արժանահավատ տեղեկատվություն: Այդուհանդերձ, Հարթակում զետեղված տեղեկատվության հիման վրա կայացված որոշումների արդյունքում և/կամ գնման հնարավորությունները դիտարկելու պահի դրությամբ Հարթակում տեղադրված տեղեկատվության, այդ թվում վաճառողների, նրանց կողմից առաջարկվող ապրանքների, դրանց առկայության/հասանելիության, բնութագրերի, առանձնահատկությունների, գների, գնման հնարավորությունների և կարգի հետ կապված, ինչպես նաև տեղադրված ցանկացած տեղեկատվության տարբերության/փոփոխության, ինչպես նաև գնման պահի դրությամբ որևէ ապրանքի որևէ հիմքով վաճառքի անհնարինության դեպքում Բանկը կամ Հարթակը որևէ պատասխանատվություն չեն կրում և Օգտատերը չի կարող նշվածի առնչությամբ որևէ պահանջ ներկայացնել Բանկին կամ Հարթակին կամ վերջիններից պահանջել հատուցել վերոնկարագրյալ հիմքերի կամ դրանցից որևէ մեկի կամ մի քանիսի հետևանքով կրած վնասները, ծախսերը կամ բաց թողնված օգուտը:

15. Բանկը կամ Հարթակը որևէ պատասխանատվություն չեն կրում Հարթակում ներկայացված որևէ ապրանքի որակի, ապրանքի ժամանակին առաքման, ապրանքի վերադարձման դեպքում ապրանքի դիմաց վճարված գումարի փոխհատուցման և ապրանքին կամ դրա գնման գործընթացին առնչվող որևէ այլ խնդրի համար: Հարթակում ներկայացված բոլոր ապրանքների առնչությամբ ցանկացած բողոք և/կամ պահանջ ենթակա է ներկայացման համապատասխան ապրանքը Հարթակում ներկայացնողին և/կամ դրանք համապատասխանաբար վաճառողին:

16. Հարթակն իրավասու է առանց որևէ նախնական ծանուցման փոփոխել Հարթակում զետեղված ցանկացած տեղեկատվություն, մասնավորապես` ինչպես Հարթակում ներկայացված ապրանքների տեսականին, այնպես էլ վերջիններիս վաճառքին վերաբերող ցանկացած պայման և Հարթակում զետեղված ցանկացած այլ տեղեկատվություն, այդ թվում` նաև նվազեցնել կամ հավելել տեղադրված տեղեկատվությունը և/կամ սահմանված պայմաններն ու պահանջները:

Հետադարձ կապ, մեկնաբանություններ և կարծիքներ

17. Հարթակի շրջանակում հետադարձ կապն իրականացվում է հետևյալ կերպ.

17.1 Ներկայացված ապրանքի, վերջինիս որակի, քանակի, առաքման և ապրանքին վերաբերող ցանկացած այլ հարցի կամ որոշակի պարզաբանումների անհրաժեշտության դեպքում Դուք անմիջապես դիմում եք    տվյալ ապրանքը  Վաճառողին` ապրանքի էջում անմիջապես հարցում ուղարկելով վերջինիս կամ Վաճառողի հետ կապ հաստատելով Հարթակի «Մեր գործընկերները» բաժնում նշված Վաճառողի էլ. փոստին գրավոր նամակ ուղարկելու կամ կոնտակտային հեռախոսահամարով կապ հաստատելու միջոցով: 

17.2 Հարթակի տեխնիկական սպասարկման, Հարթակում ապրանքներ որոնելու և գնման գործընթացում առկա տեխնիկական խնդիրների, Ձեր փորձառության հետ կապված առաջարկների կամ բարելավումների դեպքում կապ եք հաստատում Հարթակի հետ 010 513130 հեռախոսահամարին զանգ կատարելու կամ shop@liooli.am էլ. փոստի հասցեին նամակ գրելու միջոցով:

17.3 Ձեր վճարային քարտով վճարումների հետ կապված խնդիրների կամ հարցերի դեպքում կապ եք հաստատում Ձեր քարտը թողարկող բանկի հետ: 

18.  Հարթակից  գնված ապրանքի  վերաբերյալ Դուք կարող եք հայտնել կարծիք` տվյալ ապրանքի էջում մեկնաբանելով գնված ապրանքի որակը, առանձնահատկությունները, ինչպես նաև ունեցած  փորձառությունը: 

19. Հարթակում ապրանքի վերաբերյալ կարծիքի գրառման դեպքում Դուք պարտավորվում եք ներկայացնել արժանահավատ տեղեկատվություն, որը չի պարունակում որևէ 3-րդ անձի նկատմամբ վիրավորական արտահայտություն կամ տվյալ ապրանքը որակազրկելու դիտավորություն:  

20. Հարթակն իրավասու է հեռացնելու Ձեր կողմից ներկայացված ցանկացած մեկնաբանություն կամ կարծիք, որը կպարունակի վիրավորական արտահայտություն կամ ապրանքը որակազրկելու դիտավորություն: 

21. Բանկը և Հարթակն իրավասու են իրենց սոցիալական ցանցերի էջերում, ինչպես նաև այլ հարթակներում հրապարակելու/օգտագործելու Ձեր կողմից Հարթակում կատարված մեկնաբանությունները և կարծիքները:  

Առաքում, գնումների վերադարձ և գումարի փոխհատուցում

22. Հարթակից գնված ապրանքի առաքումն իրականացվում է անմիջապես տվյալ ապրանքը ներկայացնող վաճառողի կողմից: Ընդ որում, վաճառողը կարող է կիրառել լրացուցիչ միջնորդավճար առաքման համար, որի արժեքը կարտացոլվի Օգտատիրոջ զամբյուղում` ավելանալով տվյալ ապրանքի արժեքին:

23. Հարթակի միջոցով գնված ապրանքների առաքումը Երևան քաղաքում և ՀՀ մարզերում իրականացվում է Հարթակում հայտարարված ժամկետներում: Բանկը կամ Հարթակը պատասխանատվություն չեն կրում Վաճառողի կողմից Հարթակի միջոցով գնված ապրանքների առաքման ժամկետները չպահպանելու համար: Այդուհանդերձ, Դուք կարող եք հետադարձ կապի միջոցով տեղեկացնել առաքման ժամկետների խախտումների վերաբերյալ, եթե դրանք տեղի են ունեցել ոչ Ձեր համաձայնությամբ, որպեսզի քննության առնվի Հարթակում Վաճառողի գործունեություն ծավալելու նպատակահարմարությունը: Առաքման պայմաններին, ինչպես նաև ժամկետներին Դուք կարող եք առավել մանրամասն ծանոթանալ Առաքման մասին էջում: 

24.  Գնված ապրանքների փոխարինումն ու վերադարձն իրականացվում է  «Սպառողների իրավունքների պաշտպանության մասին» ՀՀ օրենքի շրջանակում յուրաքանչյուր Վաճառողի կողմից սահմանված ընթացակարգով: Մասնավորապես` Օգտատերերն իրավունք ունեն գնված ապրանքն իրենց հանձնվելու օրվանից 14 օրվա ընթացքում փոխարինել կամ վերադարձնել ապրանքը, բացառությամբ ՀՀ օրենսդրության համաձայն բացառություն կազմող ապրանքների տեսակների: Նման մտադրության մասին Օգտատերերն անմիջապես տեղեկացնում են Վաճառողին` Հարթակի «Մեր գործընկերները» բաժնում նշված Վաճառողի էլ. փոստին գրավոր նամակ ուղարկելու կամ կոնտակտային հեռախոսահամարով կապ հաստատելու միջոցով: Ապրանքի վերադարձի կամ փոխարինման պահանջը ստանալու օրվանից 1 /մեկ/ աշխատանքային օրվա ընթացքում Վաճառողը կապ կհաստատի Օգտատիրոջ հետ` ներկայացնելով ապրանքի վերադարձի և/կամ փոխարինման մանրամասները: Վաճառողը պարտավորվում է Օգտատիրոջ կողմից նման պահանջի ներկայացման պահից մինչև 3 /երեք/ օրացույցային օրվա ընթացքում` Երևան քաղաքի դեպքում, և մինչև 5 /հինգ/ օրացույցային օրվա ընթացքում` ՀՀ մարզերի դեպքում, կամ Վաճառողի և Օգտատիրոջ միջև համաձայնեցված ժամկետում ապահովել ապրանքի համապատասխանաբար` փոխարինումը կամ վերադարձը` սեփական միջոցների հաշվին, եթե տվյալ ապրանքի փոխարինման կամ վերադարձի պատճառը ապրանքի վնասված, թերի լինելն է, կամ Հարթակում զետեղված նկարին և ապրանքի նկարագրությանը չհամապատասխանելն է: Նշվածներից տարբերվող պատճառներով փոխարինման կամ վերադարձի դեպքում Վաճառողը կարող է գանձել Հարթակի Առաքման մասին բաժնում սահմանված առաքման միջնորդավճարը: Այդուհանդերձ, խորհուրդ ենք տալիս ապրանքի ստացման պահին հնարավորինս համոզվել տվյալ ապրանքի լիարժեքության և Ձեզ համար պիտանելիության հարցում` խուսափելով հետագա փոխարիման կամ վերադարձի հետ կապված գործընթացից:

25. Ապրանքի վերադարձի պարագայում վաճառողից վերադարձի մասին համապատասխան հաստատումը ստանալուց և Վաճառողի կողմից վերադարձման, ինչպես նաև ենթակա գումարը Բանկում բացված իր բանկային հաշվին ապահովելուց հետո 3 /երեք/ բանկային օրվա ընթացքում կիրականացվի գումարի վերադարձ Ձեր քարտին` հաշվի առնելով նաև ապրանքի վերադարձի համար գանձման ենթակա առաքման միջնորդավճարը /առկայության դեպքում/:  

26. Հարթակը պատրաստակամ է իր հնարավորությունների սահմաններում գործադրելու լավագույն ջանք Ձեր կողմից գնված ապրանքների վերադարձի և գումարի փոխհատուցման սահուն գործընթացի ապահովման հարցում:  Այդուհանդերձ, Բանկը կամ Հարթակը պատասխանատվություն չեն կրում սահմանված ժամկետում Վաճառողի կողմից փոխհատուցումը չիրականացնելու, մասամբ իրականացնելու կամ ուշացումով իրականացնելու համար:

27. Օգտատիրոջ ցանկությամբ ապրանքի փոխարինման դեպքում, եթե Կանոնների 24 կետի համաձայն առաջանում է ապրանքի վերադարձման համար առաքման միջնորդավճարի գանձման հարց, տվյալ պատվերի գծով կատարվում է վերադարձ` գումարի վերադարձն իրականացնելով Կանոնների 25 կետով սահմանված կարգով, իսկ փոխարինվող ապրանքի համար Օգտատիրոջ կողմից ձևակերպվում է գնման նոր պատվեր:      

Օգտատիրոջ անհատական էջի դադարեցում

28.  Հարթակում Ձեր անհատական էջի դադարեցման մտադրության դեպքում անհրաժեշտ է գրավոր նամակ ուղարկել` Հարթակում զետեղված էլ. փոստի հասցեին` նշելով դադարեցման պատճառը:  

29. Հարթակը Ձեր նամակի հիման վրա կդադարեցնի Ձեր գործունեությունը Հարթակում նամակը ստանալու պահից մինչև 5 /հինգ/ աշխատանքային օրվա ընթացքում` դադարեցման պահին Հարթակում գրանցված Ձեր էլ. փոստին ուղարկելով դադարեցման մասին ծանուցում: Ընդ որում, մինչև Ձեր գործունեության փաստացի դադարեցումը Հարթակում Դուք ամեն դեպքում իրավասու եք Հարթակում զետեղված էլ. փոստի հասցեին գրավոր նամակ ուղարկելով խնդրել գործունեությունը դադարեցնելու վերաբերյալ Ձեր գրավոր նամակին ընթացք չտալ:

30. Հարթակում Օգտատիրոջ գործունեությունը կարող է դադարեցվել նաև Կանոնների 9 կետի համաձայն: 

31. Այդուհանդերձ մինչև դադարեցումը Հարթակն իրավասու է կապ հաստատել Օգտատիրոջ հետ դադարեցման մտադրության վերաբերյալ լրացուցիչ պարզաբանումների համար: 

32. Նախքան Հարթակում Օգտատիրոջ անհատական էջի դադարեցումը և դրանից բխող իրավական հետևանքների առաջացումը, Օգտատիրոջ կողմից Հարթակի միջոցով կնքված բոլոր գործարքների գծով Օգտատերը շարունակում է կրել բոլոր պարտականություններն ու պատասխանատվությունը` համաձայն Կանոնների:

Վեճեր և վիճարկումներ

33. Հարթակի և Օգտատերերի միջև Կանոններով ամրագրված ցանկացած կարգավորման առնչությամբ ծագած վեճերն ու տարաձայնությունները լուծվում են բանակցությունների միջոցով: Ընդ որում, 15 /տասնհինգ/ օրյա ժամկետում համաձայնության չգալու դեպքում ծագած վեճերն ու տարաձայնությունները լուծվում են ՀՀ օրենսդրությամբ սահմանված կարգով:

11RBD RL 72-45-02, Խմբ. 3, ուժի մեջ է` 05.05.2021թ.-ից