Hirik
Ֆլորենտական շուշան, արևի հարս, սիրո և գարնան ծաղիկ, խիզախության խորհրդանիշ, կամ սիրելիս. աշխարհի տարբեր անկյուններում այսպիսի գեղեցիկ անուններով են կոչում հիրիկը կամ փնջածաղիկը:
«Hirik» հայկական ընկերության ստեղծման պատմությունը գեղեցիկ է, ինչպես համանուն ծաղիկը: Մասնագիտության ու հիմնական աշխատանքի հետ որևէ կերպ չառնչվող և զուգահեռներ չունեցող սիրելի զբաղմունքը ընկերության հիմնադիր Լիլիթ Զադայանի համար ժամանակի ընթացքում դառնում է ընտանեկան բիզնես. ամուսնու հետ որոշում են պատրաստել Հայաստանում դժվարությամբ ձեռք բերվող յուղեր ու եթերայուղեր և արտադրություն հիմնել:
Ապրանքանիշի անվան հարցում երկար մտորումներ չեն ունենում և ընտրում են «Hirik» անվանումը, քանի որ դեռևս հնագույն ժամանակներից նրա արմատներից ստացված յուղը որպես շատ արժեքավոր բաղադրիչ օգտագործվում է օծանելիքի արտադրության մեջ։
Այսօր ապրանքանիշը ներկայացնում է նշի, ծիրանի կորիզի, կանեփի, դդմի կորիզների, ընկույզի, պնդուկի, գետնանուշի, սև քիմիոնի, քունջութի, արևածաղկի և կտավատի բնական բուսայուղեր, ինչպես նաև խնամքի միջոցներ, որոնց մի մասի համար հումք են ծառայում հենց «Hirik»-ի յուղերը։
«Hirik» ապրանքանիշն այժմ իր հաճախորդներին է առաջարկում կանանց և տղամարդկանց համար նախատեսված լոգանքի և խնամքի միջոցների երեսունից ավելի արտադրատեսակ: Ապրանքանիշի հիմնադիրները որակին զուգահեռ մեծ կարևորություն են տալիս բույրերին, որպեսզի սովորական առօրյա խնամքի միջոցները դրական հույզեր ու հուշեր պարգևեն:
Ձեզ նույնպես հրավիրում ենք փորձելու «Hirik»-ի խնամքի միջոցներն ու վայելելու բույրերի բազմազանությունը:
