Eco Farm
Կոնտակտային տվյալներ
«Eco Farm»-ի պատմությունը բնությունը սիրելու, բնության առատաձեռնությունը տեսնելու, այն գնահատելու և միշտ նոր գաղափարներով ոգեշնչվելու մասին է:
2008 թվականին ընկերության հիմնադիր Լիլիթ Ղարիբյանի ամուսինը Սյունիքում աշխատում էր ջայլամաբուծական ֆերմայում: Հենց այս հանգամանքն էլ կանխորոշում է «Eco Farm»-ի ստեղծումը: Տարիներ անց՝ 2017 թվականին, Լիլիթի ընտանիքն ուսումնասիրում է շուկայում ջայլամաբուծության պահանջարկը և որոշում է կյանքի կոչել նոր նախաձեռնություն, որը պիտի մոտ ապագայում դառնար ոգեշնչման աղբյուր և ընտանեկան բիզնես:
Հոգալով ֆինանսական բոլոր կարիքները և գնահատելով մարտահրավերները` Լիլիթի ընտանիքն անցնում է գործի ու սկսում է Եղվարդում ջայլամներ բուծել: Մսի իրացումն աստիճանաբար հունի մեջ է ընկնում: Ժամանակի ընթացքում Լիլիթը բացահայտում է, որ ջայլամի յուղը բավական օգտակար հատկություններ ունի և բարերար ազդեցություն է թողնում մաշկի վրա: Մշտապես նորարարական ճանապարհներ և մեթոդներ փնտրող ամուսինները որոշում են կայացնում օգտագործել ջայլամի յուղը և ստեղծել էկոլոգիապես մաքուր խնամքի միջոցներ: Միջոցների փորձարկմանն ու որակի ստուգմանն օգնում են մտերիմներն ու ընկերները: Լիլիթը նոր դռներ բացելու և գաղտնիքներ բացահայտելու այս ճանապարհին դարձյալ կանգ չի առնում: Մինչ արտադրանքի փորձաքննության և լիցենզավորման ավարտը նա որոշում է բացահայտել կոսմետիկ միջոցների ստեղծման գործընթացը ներսից. գրանցվում է կոսմետոլոգիայի դասընթացների և խորամուխ լինում օճառագործության մեջ: Արտադրանքի լիցենզավորումից հետո Լիլիթն ընդլայնում է արտադրությունը և միջոցների լայնամասշտաբ վաճառքը:
«Eco Farm»-ն այսօր առաջարկում է ջայլամի յուղի հիմքով պատրաստված միջոցներ, որոնք եզակի են իրենց բաղադրությամբ, ունեն դրական, բուժիչ ազդեցություն և նախատեսված են մաշկի տարբեր տեսակների համար:
